Зөвлөгөө

Та зундаа зориулж турахаар шийдсэн үү? Ямар ч байсан зорилт тавьсанд чинь баяр хүргье! Та мөрөөдлийнхөө биед нэг алхамаар ойртжээ. 

Өнөөдөр би хоолны тухай ярихгүй, дасгалын талаар ч зөвлөхгүй. Харин таныг өөрийнхөө орчинд нэг анхаарлаа хандуул гэж зөвлье. Фитнес ч бай фитнес биш ч бай ямарваа нэг зорилго тавьсан бол түүнд хүрэхэд орчин хамгийн чухал. Орчин гэдгээр маш олон зүйлийг ойлгож болно, миний цохон тэмдэглэмээр байгаа зүйл бол таныг хүрээлж буй хүмүүс. 

Би өөрийгөө эерэг, зорилго тэмүүлэлтэй хүмүүсээр хүрээлдэг, учир нь тэд миний амьдралд намайг хэн байх вэ гэдгийг тодорхойлох хамгийн том хүчин зүйлс. Тэднээс би үргэлж үлгэрлэл авч, амжилтаас нь ч алдаанаас нь ч сургамж авдаг. Хүнийг мэдэхийг хүсвэл найзыг нь хар гэж үг бий. Та өөрийгөө мэдмээр байвал тантай хамгийн ойр байдаг 5 хүнийг хараад дүгнэхэд л болно. 

Хүмүүсийн енерги халдамтгай байдаг. Таныг доош нь хийдэг, хов ярьдаг, хүн муулдаг, асуудал тоочдог хэрнээ шийдэлийг санал болгодоггүй, юмны сөрөг талыг нь хардаг хүнээс зайгаа барь гэж зөвлье. Тийм сөрөг хүмүүс хаашаа ч юм енергийг тань соронз мэт сорчихдог. Енергиэ хамгаал. Хэрэв дээр дурьдсан шинж чанарууд таныхтай таарч байвал өөртөө өөрчлөлт хийгээрэй, гуйя. 

Оюун санааны хүчин чадал ч мөн биеийнхтэй адил. Дасгал хэрэгтэй. Аливаа зүйлийн сайн сайхныг харж мууг муухайг нь харах гээд байвал өөрийгөө *загнаж* сураарай. Бусдад бас инээмсэглэл бэлэглэж бай, өөдөөс нь инээмсэглэ. Бид энэ нийгэмийг гэрэл гэгээтэй байлгахад хувь нэмрээ оруулдаг эд эсүүд юм шүү дээ! Гое ороолттой охин байвал ороолтыг нь магт, гое үсээ зассан байвал тэрнийг нь хэл! Маш энгийн байгаа биз! Цаашлаад танд үлгэрлэл болдог, урам өгдөг хүн байвал бас хэл, таларх. Би сүүлд өөрийн нягтлангийнхаа багшдаа түүнээс ямар их эрч хүч, үлгэр дууриал авдгаа хэлж талархсан :)

Таныг хүрээлдэг хүмүүс бас таныг дэмждэг байх хэрэгтэй. Та л ганцаараа турна гээд зүтгээд байдаг, гэрийнхан чинь. найзууд чинь хог (**) идээд байвал танд маш хэцүү байх болно. Тиймээс хамтдаа зорилго тавь, гэр бүлээрээ эрүүл чийрэг бол, найзуудаараа эрүүл чийрэг бол, тэднийг уриал. Энэ зорилгодоо хүрэхийг ямар их хүсч байгаагаа хэл. Тэд ойлгох болно. 

Би анх тэмцээнд орно гээд найздаа хэлэхэд, ямар тэнэгийн яах гэж байгаан гэж байсан. Тэмцээнээ эхлээд нэлээн судалж байгаад догдолж хэлсэн чинь урдаас тэгэхэд нь зүрх урагдах шиг болсон. Би тэр дор нь хэлсэн, надад хэцүү байна, надад чиний дэмжлэг хэрэгтэй гэж. Найз маань ч юу хийснээ ухаараад шууд л хүлээж аваад, тэр өдөрөө хэдэн цагийн дараа фитнес моделиудын зураг харуулаад л энэ гое байна энэ ийм байна гээд л дэмжээд ирсэн нь хэчнээн сайхан байсан гээч. Одоо тэр миний хамгийн том дэмжлэг, тулгуур :)

Тиймээс өөрийгөө эерэг хүмүүсээр хүрээл, та өөрөө сөрөг бол муу зангаа зас, зорилгодоо ойр дотныхоо хүмүүстэй хамт хүр. Уриал. Амжилт хүсье.